Градоначалникот Сотир Лукровски присуствуваше на свеченото одбележување на Меѓународниот ден на Бошњаците, кое се одржа на 27 септември во Малата сала на Филхармонијата на Република Северна Македонија. Настанот беше посветен на богатото културно наследство, традицијата и идентитетот на бошњачкиот народ, но и на вредностите што нè поврзуваат – меѓусебното почитување, разбирањето, соработката и заедништвото.

 За жал, повторно сме сведоци на вандализам врз јавната и урбаната опрема. На детското игралиште во Карпош 1 се оштетени повеќе детски реквизити, како и дел од останатата урбана опрема. Општина Карпош секоја година издвојува средства за одржување, обновување и унапредување на јавните површини, а континуирано инвестира и во поставување и реконструкција на детски игралишта и урбана опрема.

За жал, вложувањата во создавање безбедни и уредни простори за најмладите повторно се доведуваат во прашање поради неодговорното однесување и вандалските случаи.

 Јавните површини се заедничко добро на сите граѓани. Ги повикуваме сите да се однесуваме одговорно и заеднички да придонесеме за нивно зачувување.

Околу 20 ученици од четврта година, од архитектонскиот отсек при СГГУГС „Здравко Цветковски“ – ГУЦ, беа во посета на Општина Карпош, каде имаа можност одблизу да се запознаат со работата на Секторот за урбанизам. Целта на посетата беше учениците да стекнат практични знаења и да видат како функционира општинската администрација во областа на урбанизмот, поврзувајќи го своето теоретско образование со реалната работа на терен. Урбанистите од Општина Карпош ги запознаа средношколците со надлежностите на општината, организацијата и динамиката на работата, како и со секојдневните задачи и обврски на вработените во секторот. Учениците активно се вклучија во дискусијата, поставувајќи прашања и интересирајќи се за теми поврзани со нивната образовна и професионална област. Општина Карпош останува отворена за посети на ученици од основните и средните училишта, со цел преку непосредно запознавање со работата на локалната самоуправа да придонесе кон нивната практична наобразба и надградување на знаењата.

Општина Карпош денеска го одржа третиот „Отворен ден“, со цел унапредување на директната комуникација со граѓаните. Во холот на општинската зграда од 14 до 17 часот, голем број карпошани имаа можност лично да разговараат со градоначалникот Сотир Лукровски и со раководителите на општинските сектори, поставувајќи конкретни прашања и на непосреден начин споделувајќи ги своите проблеми и предлози.

Преку транспарентна и двонасочна комуникација, Општина Карпош продолжува да гради отворен однос со своите сограѓани, залагајќи се за нивно активно учество во креирањето на локалните политики и решенија.

Во ООУ,,Петар Поп Арсов” поставен е специјализиран вендинг уред за собирање на мали отпадни електрични и електронски уреди. Оваа акција се реализира во соработка со ЕЛКОЛЕКТ ДОО и Општина Карпош, а целта е најмладите да научат како правилно да постапуваат со електронскиот отпад како и да придонесат кон заштита на животната средина. Преку оваа иницијатива, учениците се информираат за значењето на правилното собирање и рециклирање на електронскиот отпад, кој често завршува на несоодветно место. Во поставениот вендинг уред, учениците имаат можност да донесат мали електрични и електронски уреди кои повеќе не ги користат и со тоа ќе добијат тикет за секој правилно одложен отпад.

За најактивните ученици, односно оние кои ќе добијат најмногу тикети, следува награда, а награда предвидена е и за училиштето. Со правилно собирање на електронскиот отпад, учениците учат дека грижата за животната средина започнува од секој од нас.