Под мотото „Здрава храна за силна енергија“, во градинката „Мајски Цвет“ денеска беше одбележан Светскиот ден на храната. На настанот присуствуваше и градоначалникот на Општина Карпош, Сотир Лукровски, кој ги поздрави дечињата од јавните детски установи на територијата на Општина Карпош, како и нивниот воспитно-образовен и технички кадар. Во своето обраќање, градоначалникот Лукровски истакна дека создавањето здрави навики кај децата од најрана возраст е важен предуслов за нивниот правилен раст и развој, но и за градењето здрави и одговорни личности во иднина. „Стекнувањето здрави навики од најмала возраст, освен што е важно за правилниот раст и развој на децата, значајно е и за создавањето култура на грижа за сопственото здравје.

Преку дисциплина и одговорен однос кон здравјето, децата уште од најрана возраст ги усвојуваат вредностите кои ќе им помогнат да израснат во здрави и одговорни личности – како кон себе, така и кон општеството“, нагласи градоначалникот Лукровски. Во рамки на одбележувањето, преку видео-презентација беа претставени дел од активностите што ги реализираат најмалите карпошани во градинките, преку кои на практичен и забавен начин учат за значењето на здравата исхрана и стекнувањето здрави животни навики.

Програмата беше збогатена и со музички и танцов перформанс на децата, кои со својата енергија и креативност придонесоа за посебна атмосфера на одбележувањето на овој значаен ден. Градоначалникот Лукровски на претставниците на четирите јавни детски установи на територијата на Општина Карпош им додели благодарници, како знак на признание за нивната посветеност и придонес во згрижувањето, негата, воспитувањето и образованието на најмладите жители на Карпош.

Општина Карпош останува посветена на создавање услови за здраво и квалитетно детство, поттикнување здрави животни навики и обезбедување средина во која секое дете може правилно да расте, да се развива и да ги гради своите потенцијали.

Се свикува 19. седница на Советот на Општина Карпош за 22 октомври 2026 година (четврток), со почеток во 10.00 часот.

За седницата се предлага следниот:

ДНЕВЕН РЕД

–           Усвојување записник од 18. седница

1. Предлог-Заклучок за усвојување на Кварталниот извештај за извршување на Буџетот на Општина Карпош за извештајниот период (кумулативно) за квартал од 01.01.2026 година до 30.09.2026 година
2. Предлог-Одлука за давање согласност за објавување Јавен оглас за пријавување на заинтересирани лица за членување во Партиципативното тело на Општина Карпош во областа на урбанизмот
3. Предлог-Одлука за изменување на Одлуката за давање согласност за изготвување на Физибилити студија за утврдување на извори на техничка вода на подрачјето на Општина Карпош
4. Предлог-Решение за изменување и дополнување на Решението за именување на претседател и членови на Комисијата за заштита на животната средина и природата (екологија и енергетска ефикасност)
5. Предлог-Решение за изменување и дополнување на Решението за именување на претседател и членови на Комисијата за култура;
6. Предлог-Решение за изменување и дополнување на Решението за именување на претседател и членови на Комисијата за негување и чување на традициите на македонскиот народ и македонската држава и заштита на историските споменици и спомен обележја;
7. Предлог-Решение за изменување и дополнување на Решението за именување-верификација на членови од редот на Советот на Општина Карпош за формирање Комисија за доделување на еднократна парична помош (лекување и социјален ризик) за 2026 година
8. Предлог-Одлука за прогласување на заслужни граѓани на Општина Карпош за 2026 година
9. Предлог-Одлука за доделување признание за долгогодишна соработка и партнерство, во интерес на граѓаните на Општина Карпош на Полициска станица од општа надлежност Карпош
10. Предлог-Одлука за доделување признание за долгогодишна соработка и партнерство, во интерес на граѓаните на Општина Карпош на Бригада за противпожарна заштита – пункт Тафталиџе
11. Предлог-Одлука за доделување признание за долгогодишна соработка и партнерство, во интерес на граѓаните на Општина Карпош на ЈЗУ „Здравствен дом“ Скопје – итна медицинска помош
12. Предлог-Одлука за наградување на истакнат полициски службеник од Полициска станица од општа надлежност Карпош
13. Предлог-Одлука за наградување на истакнат пожарникар од Бригада за противпожарна заштита – пункт Тафталиџе
14. Предлог-Одлука за наградување на истакнат здравствен работник од ЈЗУ„Здравствен дом“ Скопје – итна медицинска помош
15. Предлог-Одлука за наградување на истакнат вработен во Општина Карпош

Седницата на Советот ќе се одржи во просториите на Општина Карпош (сала за совет).

          Телефон за контакт: 070/410-631              

По повод Светскиот ден за намалување на ризикот од катастрофи, а во рамки на одбележувањето на 50-годишниот јубилеј на Општина Карпош, во спортската сала „Наум Наумовски – Борче“ се одржа едукативна презентација посветена на значењето на превенцијата, подготвеноста и навременото постапување при ризици од катастрофи. На настанот присуствуваа околу 150 учесници од основни и средни училишта, како и студенти, кои имаа можност да се запознаат со основните принципи на превенција и намалување на ризиците, како и со значењето на личната и колективната одговорност во ситуации на потенцијална опасност. Преку ваквите едукативни активности се поттикнува развојот на култура на превенција, особено кај младите, со цел тие да стекнат знаења и вештини кои можат да бидат од особено значење во услови на вонредни ситуации. Општина Карпош, преку Одделението за заштита и спасување, континуирано реализира вежби, обуки, едукативни предавања и други превентивни активности насочени кон унапредување на подготвеноста за справување со различни ризици. Информирана, подготвена и одговорна заедница е најважниот чекор кон намалување на ризиците и заштита на човечките животи.

По повод Денот на народното востание – 11 Октомври, делегација од Општина Карпош, предводена од градоначалникот Сотир Лукровски, положи свежо цвеќе пред спомен-обележјето на народниот херој Кузман Јосифовски – Питу.

На настанот присуствуваа претседателот на Советот на Општина Карпош, Христо Саракинов, советници и бројни граѓани кои дојдоа да оддадат чест и да се поклонат пред споменот на народниот херој и борците за слобода.

Со овој чин беше оддадена почит кон неговото дело и кон сите борци кои ги положија своите животи за слободата на македонскиот народ и создавањето на современата македонска држава.

Вечна слава!

Почитувани граѓани,

Општина Карпош ви го честита 11 Октомври – Денот на народното востание, еден од најзначајните државни празници, кој го одбележуваме со гордост и почит.

Овој ден е симбол на храброста, пожртвуваноста и стремежот кон слобода, правда и достоинство, вредности кои ги носиме како трајно наследство од генерациите пред нас.

Нека 11 Октомври биде потсетник дека со единство, одговорност и посветеност можеме да градиме подобра иднина за нашата татковина и за генерациите што доаѓаат.

Честит 11 Октомври!

Општина Карпош со гордост ги следи успесите на младите карпошани кои со својот труд, посветеност и спортски талент постигнуваат одлични резултати на меѓународни натпревари.

Ерик Антон, ученик во IV-а одделение во ООУ „Лазо Трповски“, освои прво место во својата категорија на меѓународниот џудо турнир „Sakura Cup – Katerini 2026“ во Катерини, Грција.
На истиот турнир, одличен настап имаа и Лука Настовски и Стефан Вељјаноски, ученици во III-а одделение во ООУ „Вера Циривири – Трена“, кои го освоија третото место и бронзен медал во возрасната категорија U8.

Ерик, Лука и Стефан се членови на Џудо клубот „Суперџудо“, а на турнирот покажаа голема борбеност, дисциплина, посветеност и желба за победа.

Нивните резултати се потврда за вложениот труд и континуираната работа, но и убав пример дека со посветеност и истрајност младите можат да постигнуваат значајни спортски успеси.

Честитки до Ерик, Лука и Стефан! Општина Карпош им посакува уште многу успеси, медали и спортски достигнувања во иднина!

Општина Карпош со особено задоволство ги проследува и слави успесите на младите карпошани, кои со својот талент, труд и посветеност постигнуваат одлични резултати.
Катја Билбиловска, ученичка во V-б одделение во ООУ „Димо Хаџи Димов“, освои три златни медали на меѓународен натпревар во пливање во Србија.

Катја беше најуспешна во дисциплините 50, 100 и 200 метри слободен стил, освојувајќи ги првите места во својата категорија.

Дополнително, во својата категорија, Катја го освои и првото место во Македонија на 50 метри слободен стил.