Советот на Општина Карпош ја одржа  својата 20. седница во чии рамки беа разгледувани три точки кои се најдоа на денешниот дневен ред. По деталното образложение на општинските служби од Секторот за финансиски прашања, советниците ги поддржаа измените и дополнувањата на Буџетот на Општина Карпош за 2026 година. Имено, одлуката за овој ребаланс  произлезе од потребата за да се прераспределат средствата по програми, потпрограми и конта, согласно потребите за нивна реализација, односно да се обезбедат средства за исплата на плати и придонеси од плата на вработените во основните училишта и детските градинки.

               Извесно намалување на вкупниот износ на општинскиот Буџет има поради намалување на програма за кои се доделуваат средства со Одлука на Влада на РСМ, поточно, средствата се намалени во износ од 67.315 денари. Во таа насока, вкупниот консолидиран Буџет на локалната самоуправа со втората измена и дополнување на Буџетот изнесува 2.213.425.333 денари. Сега, со намалените средства за кои се доделуваат средства со Одлука на Владата на РСМ, Буџетот на Општината изнесува 2.213.758.018 денари.

               Советниците постигнаа мнозински консензус околу усвојување на Предлог – Планот на Програмите за развој на Општина Карпош за 2027 година. Согласно потребите од областа на комунални работи и уредување на просторот, се утврдува преземање на одредени активности, со цел подобрување на инфраструктурните капацитети во општина Карпош. Станува збор за реконструкција на дел од улицата Атинска, на дел од улица Софиска во УЗ Тафталиџе 2, а се предвидува и реконструкција на дел од улицата Трифун Бузев ВО Карпош 4. Во населбата Бардовци треба да се реконструира дел од улицата К, додека пак во Карпош 2 се планира реконструкција на дел од улицата Бранислав Нушиќ. Според развојната Програма треба да се реконструира дел од улицата Загребска со изведба на потпорен ѕид, а во Бардовци се планира изградба на новопроектирани улици 5, 6 и 7. Во план за реконструкција влегуваат и ул. Џумајска, изградба на ул. 1687 во Бардовци, изградба на новопроектирана улица 3 и дел од новопроектирана улица 2, додека пак во Злокуќани се планира изградба на новопроектирана улица 7. Во план е да се гради фекална и атмосферска канализација на ул. 1687 во населеното место Бардовци, а ќе се вложува и во изградба на инфраструктурни објекти на новопланираните улици 5, 6 и 7 во Бардовци. Ќе се обновува фекалната канализација низ Бардовци и ќе се вложува во изградба на детската градинка Пролет 2 во Козле. Во 2027 година според Програмата за развој, треба да се гради повеќенаменската сала во ООУ „Димо Хаџи Димов“, а исто така во план е реализација на проектот за партерно уредување и озеленување на просторот помеѓу реката Вардар и бул.Илинден, на потегот со улица Никола Парапунов и улица Љубљанска.

               Советот ја прифати и Одлуката за прифаќање на донација, од Друштво за промет ВАРУС ДООЕЛ експорт – импорт, Скопје. Станува збор за донација на една (користена) топлинска пумпа, за потребите на Општина Карпош. Станува збор за донација со вкупна вредност од 810.000 денари со пресметан ДДВ.

​На свечен начин, преку централна манифестација која вчеравечер се одржа во хотелот Александар Палас, Општина Карпош ја одбележа 50 годишнината од своето основање. На гала вечерта присуствуваа градоначалникот Сотир Лукровски, членови на Советот, претставници од општинската администрација, видни личности од општествено – политичкиот живот во Македонија, претставници на дипломатскиот кор, културно – уметнички и спортски работници, претставници од медиумите, како и претставници од збратимените општини, Травник (БиХ), Стари Град Сараево (БиХ), Врњачка Бања (Србија), Тиват (Црна Гора) и претставници од пријателските општини Живинице (БиХ), и Витина (Косово).

​Во рамки на настанот кој беше збогатен со настапот на еминентни изведувачи од македонската културно – уметничка сцена, пред присутните се обрати првиот човек на Општина Карпош, Сотир Лукровски, кој во оваа пригода им посака топло добредојде на бројните гости. – Ми претставува особена чест што сте вечерва тука, заедно да го прославиме овој наш убав 50 годишен јубилеј. Бидејќи Општина Карпош ги поврзува луѓето и има капацитет да иницира, да создава содржини кои оставаат трага во заедницата.

Нашата амбиција е таа традиција да ја продолжиме и надградиме. Затоа, Општината ќе продолжи да ги поддржува креативните идеи, да ги охрабрува локалните иницијативи и да создава простор за сите граѓани да бидат дел од одлуките што го обликуваат нивното секојдневие – истакна Лукровски. ​Градоначалникот Лукровски низ обраќање им оддаде признание и на сите поранешни градоначалници, советници и општински работници, кои оставиле дел од сопствената енергија, знаење и живот за развојот на Карпош.

​По повод 50 годишниот јубилеј, Лукровски им ги додели Признанијата на Бригадата за противпожарна заштита – пункт Тафталиџе, на ЈЗУ „Здравствен дом Скопје“ – итна медицинска помош и на Полициската станица од општа надлежност – Карпош, за нивната долгогодишна соработка и партнерство, во интерес на граѓаните на општина Карпош. ​Оттука, градоначалникот Лукровски им врачи награди и на тројца истакнати работници, кои со својот ангажман дале особен придонес за жителите на локалната заедница.

Имено, награда доби Тоде Саздов, кој е истакнат пожарникар од Противпожарната бригада – пункт Тафталиџе. Саздов ја доби оваа награда за неговиот исклучителен придонес во заштитата и спасувањето на животот и здравјето на граѓаните, нивниот имот и животната средина, справувањето со пожари и други елементарни непогоди и несреќи, како и за покажаната пожртвуваност, храброст и професионалност при извршувањето на работните задачи. ​Лукровски му врачи награда на пензионираниот проф. д-р Василаки Карабашев, за неговиот исклучителен придонес во заштитата и унапредувањето на животот и здравјето на граѓаните, укажувањето итна медицинска помош, навременото и професионално постапување во итни медицински состојби, како и за покажаната хуманост, пожртвуваност, стручност и професионалност при извршувањето на работните задачи.

Општинскиот татко му врачи награда и на полицискиот службеник од ПС Карпош, Филип Мирчевски, за неговиот придонес во непречено обезбедување на јавен ред и мир, заштита на животот, личната сигурност и имотот на граѓаните, спречување во вршење криминални дела и прекршоци. ​Градоначалникот Сотир Лукровски ги додели и признанијата за заслужни граѓани на општина Карпош за 2026 година. По повод одбележување на петдеценискиот јубилеј, оваа година вакво признание добиваат осуммина жители на Карпош.

Во тој поглед, за заслужен граѓанин е прогласена Мирјана Василевска Ташковска, за нејзините спортски успеси, достигнувања и придонесот во развојот и афирмацијата на атлетиката. Овогодишен заслужен граѓанин е и Пантелеј Кочовски, за неговиот придонес во музичката уметност и забавната музика, како и за ангажманот во рамките на музичката група „Мањифико“. ​Ванчо Балевски е заслужен граѓанин на општина Карпош за 2026 година, за неговите значајни достигнувања во фудбалот и придонесот во афирмацијата на македонскиот спорт, а реномираниот македонски оперски пејач Благој Нацоски го доби признанието заслужен граѓанин на општина Карпош, за неговите врвни достигнувања во оперската уметност и исклучителниот придонес во меѓународната афирмација на македонската култура.

Признание за заслужен граѓанин му беше врачено и на познатиот македонски текстописец и пејач, Александар Митевски, за неговиот значаен придонес во македонското музичко творештво, развојот и афирмацијата на забавната музика, како и за неговиот придонес во збогатувањето на македонската музичка култура. ​За заслужни граѓани на општина Карпош за 2026 година, постхумно беа прогласени тројца истакнати личности од сферата на уметноста, културата и архитектурата. Станува збор за Анче Џамбазова, која го добива ова признание за нејзиниот исклучителен придонес во македонската култура и уметност, како и за трајното наследство што го остави во македонскиот културен и уметнички живот.

За заслужен граѓанин на Карпош (постхумно) е прогласен македонскиот писател Живко Чинго, за неговиот исклучителен придонес во македонската литература, драматургија и култура, како и за трајните вредности на неговото книжевно творештво. Исто така (постхумно), за заслужен граѓанин на Карпош е прогласен македонскиот архитект, писател и просветител Георги Константиновски, за неговиот значаен придонес во македонската архитектура, преку неговото творештво и остварувањата кои оставија траен белег во архитектонското наследство на земјата.

​Четири ученици и тројца наставници од ООУ „Димо Хаџи Димов“ добија благодарници за подготовка на креативно мултимедијално изненадување по повод 50 годишниот јубилеј на Општина Карпош. ​Специјално изненадување на вечерта беше прекрасниот сценски настап на дечињата од детскиот хор Златно славејче, кои во придружба на членовите на женскиот хор Фрида, предводени од легендарните Драган Спасов Дав и Александар Митевски ја испеаја песната за Карпош, како најубавата роденденска честитка за Општината.

По повод 50-годишнината од формирањето на Општина Карпош, во Младинскиот центар – Карпош се одржа презентација на еколошки проекти и младинско учество, посветена на улогата на младите во креирањето поодржлива и поинклузивна заедница. 

Луна Китановска, од иницијативата „ECOSOCIAL VOICES: Youth Voices“, зборуваше за важноста на младинскиот глас, активното учество и ангажманот на младите во општествените и еколошките прашања. За значењето на циркуларната економија и практичните решенија за поинклузивен и одржлив развој говореше Стефани Пренкова, додека Сотир Габелоски, преку фотоизложба посветена на реализирани микроакции, ја истакна улогата на младите во создавањето поправеден систем на храна, поддршката на локалните производители и значењето на институционалната соработка. 

Настанот заврши со интерактивна дискусија, размена на идеи и можности за младинско вмрежување, со цел преточување на иницијативите во конкретни активности и промени. Активноста ја реализираше Еко Логик, во рамки на проектот „Граѓанското општество и младите за инклузивен и одржлив развој преку циркуларна економија“, финансиран од Европската Унија, а спроведен од People in Need (ПИН), во партнерство со ЛЕАД, АРНО и Ековита.

 Зелената иднина започнува со знаење, идеи и активно учество. Младите не се само иднината – тие се двигатели на промените уште денес