БЛАГОДАРНИЦИ ЗА УЧЕНИЦИТЕ –СПОРТИСТИ И НИВНИТЕ МЕНТОРИ

Во  холот на ООУ „ Лазо Трповски“, денеска, претседателот на Советот на Општина Карпош Андреј Манолев, им  додели благодарници на наставниците по физичко воспитание од сите основни училишта кои се наоѓаат на територијата на Општина Карпош, како ментори на основците во спортските училишни лиги.  Претседателот  Манолев  им се заблагодари на наставниците, нагласувајќи дека како прв човек на Советот, постојано се заложува за подобрување на условите за спорт во Општина Карпош, бидејќи учениците во Карпош  имаат едни од најдобрите спортски резултати на републичко ниво.

-Како локална самоуправа, која  спортот го издигнува на пиедесталот, ние размислуваме и за иновативни решенија со кои ќе направиме инклузија и на основците со посебни потреби да се вклучат во спортските активности. Тоа, впрочем е и заложба на Општина Карпош, да биде инклузивна заедница за сите, потенцираше Манолев.

Поради новонастанатата ситуација околу Корона вирусот, завршницата на турнирите во училишните спортски лиги ( кошарка, фудбал, ракомет и одбојка), беше прекината, па така, Општина Карпош одлучи благодарници да добијат сите основци- учесници во овогодинешните спортски лиги. Зоран Бочваровски ( „ Аврам Писевски“), Татјана Трпезановска ( „ Братство“),  Амди Муса ( „ Владо Тасевски“), Оливера Данева од „ Вера Циривири Трена“, како и Зоран Петровски од „ Војдан Чернодрински“ се менторите-наставници на учениците. Исто така со благодарници се здобија и  Благоја Ставревски од „ Лазо Трповски“, Зоран Сивевски од „ Димо Хаџи Димов“, Александар Аргоровски („ Петар Поп Арсов“), како и Сузана Здравковска  од „ Христијан Тодоровски – Карпош “ и Марјан Угриновски од „ Јан Амос- Коменски“.