Пет јавни претпријатија на Градот Скопје, „Комунална хигиена“, „Паркови и зеленило“, „Улици и патишта“, „Водовод и канализација“ и ЈСП, од денес до крајот на неделата ќе работат засилено во Општина Карпош. Ова беше договорено на претходна координација на градоначалниците на скопските општини.

Потоа, локалната власт се координираше со сите 14 урбани заедници кои постојат на нејзина територијата, а денес претставници од Градот и од јавните претпријатија со надлежните служби во Општината оперативно се договорија за старт на работата.

Имено, традиционално, урбаните заедници од Карпош заедно со граѓаните ги лоцираат клучните проблеми кои ги имаат, а кои се во надлежност на Градот и неговите јавни претпријатија. Досега главно соработката беше со фокус на чистење и сечење на гранки, но овој пат, во следните пет дена, работниците на овие претпријатија ќе работат дополнително и на прекопи, чистење на сливници, поставување на нови капаци на шахти, крпење на ударни дупки, поставување на сообраќајни знаци, поправка на автобуските постојки, како и поставување на три фонтани за пиење вода.