ПОДОБРИ УСЛОВИ ЗА МАЛИТЕ КАРПОШАНИ

Заедничката соработка меѓу општина Карпош и Министерството за труд и социјална политика, повторно даде конкретни резултати. Имено, двете институции учествуваат во заедничката акција за изградба на нов клон на детската градинка „Пролет“, која се наоѓа во населбата Козле.

По тој повод, денеска, градоначалникот на општина Карпош Стевчо Јакимовски и министерот за труд и социјална политика Диме Спасов, го посетија објектот во изградба, кој треба да го зголеми капацитетот за прием на дечињата од предшколска возраст.

–                    Во градинката „Пролет“ во Козле која што има два клона, за упис во континуитет чекаат  од 70 до 90 деца. Со отворање на овој трет клон, практично ќе ги згрижиме сите деца кои живеат на територијата на урбаните заедници „Пецо Божиновски – Кочо“ и „Кузман Јосифовски – Питу“. Локалната самоуправа ќе се погрижи за хортикултурното уредување,  покрај тоа што го обезбедува на располагање и овој објект – истакна градоначалникот Јакимовски.

Во исто време, општина Карпош ќе гради целосно нов објект во градинката „Мајски Цвет“ во населбата Тафталиџе 1 и 2, а ќе ја реконструира детската градинка „Орце Николов“ во населбата Карпош 4. Со завршување на овие проекти,  сите урбани заедници на територија на општина Карпош ќе добијат  предшколски установи.

Во план е изградба  на нова градинка во населбата Бардовци, која исто така е заеднички проект со Министерството за труд и социјална политика, која министерот Спасов ја посочи како успешен модел на меѓуинституционална соработка, која треба да ја практикуваат и останатите локални самоуправи.