МЕЃУНАРОДНИ ИСКУСТВА ЗА ПОДОБРА ЕНЕРГЕТСКА ЕФИКАСНОСТ

Делегација од проектот EXCITE (European Energy Award in Central and Eastern Europe), деновиве оствари работна посета на Општина Карпош, при што се сретна со стручните лица од Секторот за екологија и енергетска ефикасност од локалната самоуправа. Станува збор за проект од програмата на ЕУ „Хоризонт 2020“, кој има за цел да ја стимулира имплементацијата на локални енергетски и климатски планови, да привлече приватни инвеститори и да го промовира јавното претприемништво. Инаку, функционалната компонента на проектот успешно да ги балансира јавните ресурси во 15 пилот општини во Бугарија, С. Македонија, Романија, Словачка и Украина.

На состанокот присуствуваа и гости од повеќе земји од Централна и Источна Европа (Унгарија, Бугарија, Романија, Украина, Словенија, Германија, Франција, Швајцарија и Словачка). Претставниците од Секторот за екологија и енергетска ефикасност при Општина Карпош ги презентираа активностите и проектите кои општината ги спроведува за унапредување на енергетската ефикасност во јавните објекти, но и во колективните станбени згради. Во рамки на посетата, учесниците направија обиколка на неколку општински енергетски ефикасни објекти кои користат системи на греење со термални пумпи.

На организираната работилница учесниците се запознаа и со алатките создадени во рамки на  проектот „Replace“, со кои едноставно и брзо се пресметува енергетската ефикасност и кои можат да им помогнат на општините, но и на индивидуалните домаќинства. Поточно станува збор за практичните алатки – калкулатор, матрица за греење, како и алатка за пресметка на заштеди во енергија и средства. На состанокот се говореше и за производството на соларни панели и соларни уреди, како иновативни решенија за заштеда на енергија и намалување на влијанието врз животната средина во повеќе индустрии, како и за важноста од вклучувањето на граѓаните во овие процеси, предизвиците и начините за пошироко вклучување.

Во нашата држава проектот го спроведува невладината организација Хабитат Македонија, во кој локалната самоуправа учествува како пилот општина.