КАРПОШ НА МЕЃУНАРОДНИОТ САЕМ ЗА ХРАНА И ПИЈАЛОЦИ DETROP -2017

Општина Карпош и оваа година преку свој претставник учествуваше на Меѓународната изложба на храна и пијалоци „DETROP – 2017“ која викендов се одржа во Солун – (Грција), во организација на HELEXPO (национална Агенција за организирање саеми, конгреси и културни настани).

На саемот беа претставени традиционални прехранбени производи од над 50 земји од светот, тематски одделени  и распоредени во пет саемски хали.

Присутните ги дегустираа врвните производи од млеко и млечни преработки, месо и месни преработки, риби, егзотични овошја и зеленчуци и вина.   Особен интерес кај присутните предизвика дегустацијата на подготвените вегетеријански и вегански производи и оброци.

Во рамките на манифестацијата се одржаа бројни трибини, тематско разграничени, во кои од стручен аспект се говореше за технолошката преработка на храната, органскиот квалитет и за контролата и безбедноста на храната. Во овој дел, стручното лице од Општина  Карпош, Ирена Калајџиевска – Милевска,  директно учествуваше во дебатата  на тема „Безбедноста на храната како главна алка за правилен развој на децата“. Повеќето присутни разменија свои ставови и мислења за начинот на менаџирање на  контролата на храната во предучилишните установи. Како што беше заклучено на крајот од дискусијата, целта е иста, но приодите се различни.

DETROP – изложба на храна и пијалоци, претставува врвен настан кој се одржува еднаш годишно во Солун  за кој постои  огромен интерес, во чија корист говори големата посетеност но и одличната организација.  Како што и се најавуваше, овој саем прерасна во еден од водечките од ваков карактер во Европа.