КАРПОШ МЕЃУ ОПШТИНИТЕ-ЛИДЕРИ ВО УРБАНА МОБИЛНОСТ
- септември 19, 2019
- 0
Денеска, со потпишување на посебен Протокол се формализираше соработката меѓу Општина Карпош и Германската агенција за меѓународен развој (GIZ), која резултираше со проектите: поставувањето на првото „Соларно дрво“ и доделувањето на шест електрични тротинети. Соработката ја официјализираа градоначалникот на Општина Карпош, Стефан Богоев и директорот на Регионалната канцеларија на Германско друштво за меѓународен развој (GIZ), Давид Оберхубер.
Соларното дрво кое овозможува граѓаните да ги полнат своите електрични тротинети и велосипеди, мобилни и лаптопи, е поставено во рамки на т.н. Зелена рута, која во себе вклучува и дополнителни два километри велосипедска патека и патека за ролерки.
Богоев напомена дека навиките на граѓаните, полека но сигурно се менуваат кон поддршка на ваквата мобилност и кон создавање на здрава животна средина, а Кејот на Вардар, за кратко ќе стане еден од најатрактивните делови на нашето Скопје.
– При посетата на училиштата, на првиот училишен ден, видов дека голем број на ученици доаѓаат до училиште со своите електрични тротинети/велосипеди, и тоа ме радува.
Со изведбата на Спортско – Адреналинскиот парк трајно ќе се разубави зелениот појас покрај Вардар со содржини за спорт и рекреација на сите граѓани, со што ќе се спречи овој простор да пропаѓа и да прераснува во депонија, рече Богоев.
Оберхубер ја истакна својата заложба за продолжување на соработката со Општина Карпош и преку други проекти, со цел и натаму да се креираат нови, иновативни решенија за одржлива урбана мобилност. Токму затоа,. потребна е поголема промоција на овие позитивни примери, за да се привлече вниманието од сите чинители, да преземаат активности за заштита на животната средина.
По работната средба, Богоев и Оберхубер, придружувани од своите соработници, со електрични тротинети и велосипеди, се упатија на завршната конференција на ЗЕЛС: „Поддршка на локалните самоуправи на Северна Македонија во промоција на одржлива урбана мобилност“.
На конференцијата беше поздравена активноста на Карпош на полето на урбаната мобилност, поставувањето на соларното дрво и подготовката на Планот за активности за одржлива урбана мобилност којшто беше презентиран пред учесниците на денешната конференција во ЗЕЛС.
Градоначалникот на Карпош, присутните градоначалници и нивни претставници од другите општини потпишаа и меморандум за поддршка на процесот за одржлива урбана мобилност.