ОСНОВЦИТЕ ОД „ЈАХЈА КЕМАЛ“ УЧЕА ЗА ЛОКАЛНАТА САМОУПРАВА

Четвртоодделенците од ПОУ „Јахја Кемал“ денеска беа во посета кај градоначалникот на Општина Карпош, Стевчо Јакимовски, како дел од нивната практичната настава која е предвидена во рамки на предметот Историја и Општество. Љубопитните ученици поставуваа прашања поврзани со функционирањето на локалните институции, при што првиот човек на oпштината им даваше конкретни одговори и детално им објасни на кој принцип се темелат тие.

Младите основци беа најзаинтересирани за обврските  и надлежностите на градоначалникот, како Општината ги решава проблемите од областа на екологијата, спортот и културата, за начинот на кој функционира Советот на општината и каква е структурата на локалната самоуправа. Во оваа пригода, Јакимовски ги информираше учениците за улогата на општината врз развојот на локалната заедница и како може локалната самоуправа преку проекти да влијае на одржување на здравата животна средина и подобрување на животниот стандард на своите сограѓани.