НОВ АСФАЛТ НА РАМПО ЛЕВКАТА

Во урбаната заедница „Владо Тасевски“, се комплетира целосно асфалтирањето на ул.  Рампо Левката. По тој повод градоначалникот на Општина Карпош Стевчо Јакимовски даде изјава за медиумите.

–          Во предвидениот рок, до 1 ноември, ќе ја асфалтираме ул. Рампо Левката. Со асфалтирањето на улиците: Алжирска, Анкарска, Каирска, како и на ул. Борка Талевски, која од објективни причини  подолго време се асфалтираше, заклучно со ул. Ристо Равановски, ќе имаме  целосно асфалтирани и реконстрирани улици. Понатаму, планираме да ги асфалтираме и улиците Њу Делхиска, Атинска , Бахар Мојс, кои заедно со новата ул. Дрезденска, ќе претставуваат урбана целина на комплетно реконструирани и асфалтирани улици, прецизираше првиот човек на Општината Стевчо Јакимовски.

Градоначалникот Јакимовски, исто така напомена дека атмосферската и фекалната канализација во овој дел од Општина Карпош е целосно реконструирана и нова, и нагласи дека доколку дозволат временските услови  сите овие предвидени активности ќе завршат до 1 декември. Доколку пак, не ја постигнеме  предвидената динамика во асфалтирањето и реконструкцијата на улиците, градежните активности ќе продолжат напролет, од 1 март.