15.3.2021
Богоев гостин во Телевизија 24
На следниов линк
https://www.facebook.com/24vesti.mk/videos/189646302621700
16.2.2021
БОГОЕВ: СО ДОМАШНИТЕ ПОСЕТИ ДО ПОГОЛЕМА ГРИЖА ЗА НАЈВОЗРАСНИТЕ И ЛИЦАТА СО ПОПРЕЧЕНОСТ
Хуманите патроли – домашните посети за постарите и изнемоштени лица, како и за граѓаните со попреченост ќе овозможат вистинска поддршка и зголемена грижа за овие сограѓани. Во тек е јавниот повик за негователи, кои ќе се грижат за овие лица и истиот е достапен на www.karpos.gov.mk (огласна табла). Ова го истакна градоначалникот на Општина Карпош, Стефан Богоев, кој утринава гостуваше во емисијата „Македонија наутро“ на Македонската радио телевизија.
Овој проект се спроведува во соработка со Црвениот крст на Град Скопје, а е поддржан и од Министерството за труд и социјална политика и Светска банка. Негователите ќе поминат соодветна обука за работа со посочените лица, а нивната работа ќе биде платена.
Запрашан за начинот на кој локалната самоуправа се справи со снежните врнежи, градоначалникот посочи:
– Првично, се фокусиравме на чистење на повисоките места: Жданец, Трнодол, Бардовци, улицата „Ловќенска“ во Козле и Нерези, а потоа продолживме и кон централните населби. Ги чистевме пристапите пред детските градинки, основните училишта, патеките во близина на маркетите и сл.
Овие денови беа потрошени 130 тони сол, 10 тони емулзиона течност (која спречува заледување на коловозот), се со цел да се олесни движењето на граѓаните.
Верувам дека не секаде е исчистено, но апсолутно работиме со сите сили, со целокупната механизација и работници. Патем, ги повикувам и сопствениците на компаниите, угостителските објекти, куќните совети, да ги исчистат заледените делови пред своите објекти и сите да користиме зимска опрема, рече Богоев.
Во завршниот дел од разговорот градоначалникот посочи дека општината на пролет ќе продолжи и со тековното раззеленување по населбите, а ќе биде објавен и повикот за субвенционирање на велосипеди.
10.2.2021
БОГОЕВ: ЕНЕРГЕТСКАТА ЗАДРУГА НОСИ ЕКО – ПРИДОБИВКИ, НО И СОЦИЈАЛНО – ЕКОНОМСКИ БЕНЕФИЦИИ
Карпош е на пат да ја добие првата енергетска задруга во Македонија. Имено, локалната самоуправа за овој проект аплицира со здружението „МилиЕУконтакт Македонија“, на меѓународниот повик на Германското федерално министерство за животна средина. Градоначалникот на Општина Карпош Стефан Богоев, во гостувањето во емисијата „Утрински брифинг“ објасни што всушност ќе се добие со овој проект и кој се ќе има бенефит од него:
– На покривот на училишето „Братство“, ќе се постават фотоволтаици. Се прави мини – фотоволтаична централа која ќе ја управува енергетска задруга, и која воопшто не зрачи и не пречи никому. Задругари, односно членови на таа задругата ќе бидат 100 социјално ранливи категории од Општина Карпош. Парите ги добиваме за централата како грант, а деловите, уделите од неа ќе им се поделат на 100-те најзагрозени социјални семејства во Карпош, кои практично нема да треба да вложат сопствени средства, но затоа пак, во иднина, ќе можат да остваруваат приход од оваа фотоволтаична централа, изјави градоначалникот Богоев,
-Енергетската задругата е здружение во кое може да се поврзат индивидуалци – граѓани, минимум пет, или минимум пет правни субјекти, или пак цела заедница на станари (куќен совет). Притоа, тие можат да инвестираат пари и да постават фотоволтаици на покривот на својата зграда и заедно да го делат профитот од тоа што ќе приходуваат. Придобивките од поставените фотоволтаици не се само во делот на заштедата која неминовно ќе ја остварат во потрошувачка на електрична енергија, туку ќе заштедат и во потрошувачка на топла вода. Со поставувањето фотоволтаици задружниците ќе добијат и две броила (влезно и излезно) и ќе можат, доколку произведуваат повеќе струја од нивните потреби, вишокот да го продаваат на слободен пазар.
Богоев во утринската емисија зборуваше и за потребата од измени во начинот на финансирање на локалната самоуправа.
-Сметаме дека е нелогично, како досега, доминантно, општините да се финансираат од такси за уредување на градежно земјиште, попознати како „комуналии“ кои се плаќаат при градба на куќа или зграда. Тоа натаму ја диктира политиката во начинот на функционирање на Општината, така што станува врзан круг. За поголеми приходи, за да соберат повеќе пари, општините треба да продуцираат поголема градба. Од друга страна, пак, кога продуцираат повеќе градба тоа подразбира дека има потреба и за поголемо вложување во улици, водоводи, канализации, се ицрпуваат капацитетите по градинките и училишта. Тоа е еден затворен круг кој на крајот е нелогичен од аспект на намалување на агресивното градење и потребата од помали трошоци. Никаде на Запад, во развиените земји, локалните самоуправи доминанто не се финансираат од такса за уредување на градежно земјиште. Напротив, се финансисраат од поголеми ставки, од стабилните приходи. Тоа се даноците.
-Конкретно зборувам за поголемиот дел од данокот, кој веќе се плаќа, да оди во општините: од ДДВ-то, поголем дел од средствата од данокот на игри на среќа. Еве, кај мене, граѓани од Порта Влае реагираат дека има многу отворени обложувалници, коцкарници, казина… Зошто тоа да не значи и повеќе пари за општината? Тогаш граѓаните ќе знаат дека со тоа се прибираат пари, кои ќе се наменат за нивен интерес, односно за решавање на нивните проблеми, рече градоначалникот на Карпош.
Во завршниот дел, тој се осврна и на фактот дека се работи на предлог – решението, регулирање на паркирањето во Карпош 1 и Карпош 2. Имено, граѓаните од овие населби се изјаснија „ЗА“ воведување на зонско паркирање и тоа ќе се спроведе.
Богоев истакна дека до општината пристигнале иницијативи да се спроведат анкети за регулација на паркирањето и за делот околу „Млечен“ и Влае.
Општината ќе ги спроведе овие теренските анкети во претстојниот период.
