ПРОМОВИРАН РЕСУРСНИОТ ЦЕНТАР ЗА ПОДДРШКА НА РАЗВОЈОТ НА ОПШТИНИТЕ

Градоначалникот на Општина Карпош, Сотир Лукровски, присуствуваше на промотивниот настан по повод претставување на „Ресурсниот центар за поддршка на развојот на општините“. Овој центар ќе функционира во рамки на Министерството за локална самоуправа, а ќе нуди стручна и техничка поддршка за унапредување на капацитетите на локалните самоуправи и подобрување на квалитетот на услугите на општините. Тоа подразбира обезбедување на специјализирани услуги во областа на административниот менаџмент, планирање на локалниот стратешки развој, подготовка на техничка документација и капитално планирање, финансиско планирање и управување, техничка експертиза, јакнење на меѓуопштинската соработка, подготовка на проектни апликации и искористување на средства од меѓународни фондови.

                Отворањето на овој Реурсен центар е резултат на заедничката активност на Министерството за локална самоуправа и Швајцарската Влада преку продолжување и институционализација на осумгодишниот проект „Одржлив и инклузивен рамномерен регионален развој“. Во рамки на денешниот настан беше презентирана мисијата, целите и планираните активности на Центарот, како и улогата на партнерските институции во неговото функционирање.

                Општина Карпош активно ќе се вклучи во сите активности на Ресурсниот центар за поддршка на развојот на општините и ќе работи посветено на обезбедување на квалитетни услуги за своите граѓани.