ИНСТИТУЦИОНАЛНА СОРАБОТКА ЗА МОНИТОРИНГ НА ВОДНИТЕ ТЕКОВИ

 Во Домот на култура во општина Ѓорче Петров, вчера се одржа едукативен настан посветен на мониторинг на водните текови, во организација на граѓанските организации Resource Environmental Center – REC North Macedonia, Center for Environmental Democracy – Florozon и Еко Логик. Во рамки на настанот младите од Општина Карпош, Зелениково и Ѓорче Петров, учеа како да вршат мониторинг на речните корита. Инаку оваа активност е дел од проектот „Брза проценка на водотеците на Западен Балкан – Фаза 2“, поддржан од U.S. Forest Service and Department of Defense EUCOM and Forest Service International Foundation. Работната средба започна со едукативна сесија, по што следеше практична теренска вежба на реката Лепенец. Таму младите учесници и претставници од општините имаа можност директно да ја применат СВАП методологијата (Stream Visual Assessment Protocol) и да научат како се проценува состојбата на едно речно корито. Дополнително, беа идентификувани и „жешки точки“ долж реката Лепенец. Целта на оваа иницијатива беше да се запознаат учесниците со современите методи за проценка на квалитетот на водните текови, да се зајакнат капацитетите на локалните чинители – институции, граѓански организации и експерти, како и да се поттикне поширока јавна дискусија за заштита и одржливо управување со водните ресурси. Настанот беше наменет за млади на возраст од 15 до 30 години како и за претсавници од општините Карпош, Зелениково и Ѓорче Петров, кои преку интерактивна едукација и теренска работа стекнаа нови знаења и вештини за мониторинг и заштита на речните корита.