Според работната динамика, во завршна фаза се одвиваат активностите за наскоро отворање на Центарот за дневен престој на лицата со попреченост, кој ќе биде стациониран во населбата Козле во скопски Карпош. Станува збор за дневен  центар кој ќе нуди инклузивно и функционално опкружување, каде што лицата со попреченост ќе добијат стручна грижа, психосоцијална поддршка, социјализација и развој на животни вештини.  Инаку, овој центар е резултат на заедничката соработка помеѓу Здружението за здрав раст и развој – „Неуроклиник“, Министерството за социјална политика, демографија и млади, Светска банка и Општина Карпош.

                Овој проект претставува значаен чекор кон унапредување на системот за поддршка и грижа на лицата со попреченост, изграден врз основа на стручност, партнерство и заедничка визија. На иницијативата и претходеше договор за меѓусебна соработка кој го потпишаа локалната самоуправа и „Неуроклиник“, во мај минатата година. Дневниот центар е во фаза на лиценцирање, по чие завршување ќе следува и информација до јавноста за неговото официјално отворање. Во таа насока, проектот претставува вистински исчекор кон едно хумано општество, кое ги препознава и воедно одговара на потребите на граѓаните од сите социјални категории.

                Дневниот центар се наоѓа на улица Јуриј Гагарин бр. 60 1/1, а за сите дополнителни информации и интерес за вклучување, граѓаните можат да се обратат на телефонскиот број 078 336 537 или на мејл адресата: neuroclinic.mkd@gmail.com.

Со  одржување  на првите тренинг-активности, вчера  во спортската училишна сала во ООУ „Петар Поп Арсов“, започна реализацијата на проектот „Фитнес и самоодбрана за жени и мажи“. Станува дел за проект кој е дел од програмските активности од областа на еднаквите можности меѓу жените и мажите за  2026-та година. Тренинзите  ги води искусниот тим составен од стручни кадри, предводен од д-р Страшо Глигоров, доктор на науки од областа на кинезиологијата, како и од Проф. д-р  Јонче Ивановски, декан на Факултетот за безбедност –Скопје.

Тренинзите ќе се одржуват во спортската сала во две термина,  понеделник и среда од 21:00  до 22:00 часот.

Водејќи се од добропознатата максима „во здраво  тело-здрав дух“,  Општина Карпош и во иднина ќе финансира и логистички ќе поддржува проекти од областа на физичката и спортската култура, со кои ќе се подобрува психофизичкото здравје на карпошани, создавајќи  култура на активен спортски живот .

Сите заинтересирани граѓани на Општина Карпош, може да се пријавуваат на телефонскиот број 070-274-813, со што ќе земат активно учество во проектот и ќе тренираат и учат од стручни и професионални лица.

Претпладнево, советниците од Општина Карпош ја одржаа 11-тата седница на Советот, во чии рамки расправаа и полноправно одлучуваа по 10 точки кои се најдоа на денешниот дневен ред. Во тој поглед, по деталната презентација веднаш беше усвоен Планот за заштита и спасување, кој целосно го покрива подрачјето на локалната самоуправа. Станува збор за комплексен План за заштита и спасување, кој опфаќа 12 посебни планови какви што се: плановите за асанација, врски, евакуација на населението, животна средина, засолнување на населението и материјалните добра, за подготвеност, мобилизација и ангажирање на силите за заштита и спасување, за Прва медицинска помош, потоа, за заштита и спасување од пожари и поплави, за Радиолошка – хемиска и биолошка заштита, како и плановите за заштита и спасување од урнатини и за згрижување на населението на територија на Карпош.

                Оттука, во случај на природни непогоди и други несреќи од посериозен карактер, првенствено се активира Општинскиот Кризен штаб во улога на координативно тело. Во таа ситуација ќе биде активирана и Просторната единица за заштита и спасување од Општина Карпош, која ќе делува оперативно според горенаведениот План за заштита и спасување. Инаку, Просторната единица на Општина Карпош е единствена единица од ваков вид, која функционира во рамки на локалната самоуправа и истата е формирана уште во 2011 година. Во тој контекст, советниците го усвоија и Предлог – Правилникот за заштита од пожари и експлозии.

                Членовите на Советот ја поддржаа и Одлуката за воспоставување на меѓуопштинска соработка помеѓу Град Скопје и Општина Карпош, за изградба на новопроектирана секундарна улична мрежа за дел од сервисна улица: „Д“ и дел од сервисна улица: „А“ (ул: Скупи – 3) во населбата Злокуќани. Проценетата вредност за реализација на меѓуопштинската соработка на оваа Одлука изнесува 6.289.483 денари со вклучен ДДВ, каде Град Скопје учествува со целосните средства обезбедени од сопствениот Буџет.

                Членовите на Советот ги поддржаа измените и дополнувањата на Програмата од областа на образованието за 2026 година. Поточно, финансиската рамка од 5.000.000 денари предвидена за ужинки за учениците од основните училишта се менува во изност од 4.800.000 денари, додека пак, 200.000 денари се додаваат за финансиска поддршка за меѓународна ученичка размена со партнерското училиште од Германија.

                Поддршка од Советот доби и Предлог – Правилникот за методологија за утврдување на критериуми за распределба на блок дотации за 2026 година, наменети за детските градинки на територија на Карпош. Советниците ги усвоија измените и дополнувањата на Решението за разрешување и именување на член во Управниот одбор на детската градинка „Распеана Младост“. Со истата динамика, едногласно беа изгласани и Решенијата за давање согласност на Одлуките за формирање на групи со поголем, односно со помал број на деца од законски предвидениот број на деца во групите, кои се згрижени во детските градинки на територија на Карпош.   

Поради исцрпување на паричните средства, денеска заврши акцијата за субвенционирање за купување на нови велосипеди, трицикли и карго велосипеди, која ја спроведе Општина Карпош за своите сограѓани.

Ве известуваме дека 11. седница на Советот на Општина Карпош, ќе продолжи на 02 април 2026 година (четврток) со почеток од 09:00 часот.

ДНЕВЕН РЕД

• Усвојување записник од седница

1. Предлог-Одлука за воспоставување меѓуопштинска соработка помеѓу Општина Карпош и Град Скопје за изградба на новопроектирана секундарна улична мрежа за дел од сервисна улица: „Д“ и дел од сервисна улица „А“ (ул.Скупи-3) -н.м. Злокуќани, Општина Карпош
2. Предлог-Решение за давање согласност на Одлуката за формирање на групи со поголем односно помал број на деца од законски предвидениот број на деца во групите во jавната установа општинска детска градинка „Мајски Цвет“ Карпош-Скопје
3. Предлог-Решение за давање согласност на Одлуката за формирање на групи со поголем односно помал број на деца од законски предвидениот број на деца во групите во jавната установа општинска детска градинка „Орце Николов“ Карпош-Скопје
4. Предлог-Решение за давање согласност на Одлуката за формирање на групи со поголем односно помал број на деца од законски предвидениот број на деца во групите во jавната установа општинска детска градинка „Пролет“ Карпош-Скопје
5. Предлог-Решение за давање согласност на Одлуката за формирање на групи со поголем односно помал број на деца од законски предвидениот број на деца во групите во jавната установа општинска детска градинка „Распеана Младост“ Карпош-Скопје
6. Предлог-Решение за изменување и дополнување на Решението за разрешување и именување член во Управниот одбор на Јавната установа општинска детска градинка „Распеана Младост“, Општина Карпош-Скопје
7. Предлог-Правилник за методологија за утврдување на критериуми за распределба на  блок дотациии наменети за Јавните установи општински детски градинки на подрачјето на Општина Карпош за 2026 година
8. Предлог-Програма за изменување и дополнување на Програмата за активностите на Општина Карпош во областа на образованието за 2026 година
9. Предлог-Одлука за одобрување на финансиски средства како финансиска поддршка за реализација на проект на општинското основно училиште„Владо Тасевски“, Општина Карпош – Скопје за меѓународна ученичка размена со партнерско училиште Gesamtschule Duisburg од Дуисбург, Република Германија
10. Предлог-Одлука за усвојување на План за заштита и спасување на подрачје на Општина Карпош (+презентација)
11. Предлог-Правилник за заштита од пожари и експлозии

Седницата на Советот ќе се одржи во просториите на Општина Карпош (сала за совет).

Телефон за контакт – 070/410-631                                               

Општина Карпош е активен учесник во меѓународниот проект „FAIR GAME: Gender-equal Access to Movement and Exercise“, кој официјално започна во рамки на  дводневната конференција, која неодамна се одржа во Општина Пеќ. Инаку, оваа косовска општина е водечки партнер во проектот кој е финансиран од Европската Унија, во рамки на програмата CERV (Citizens, Equality, Rights and Values Programme) и истиот обединува општини и организации од повеќе европски земји. Покрај Општина Карпош, партнери во проектот се и организации и институции од Италија, Португалија, Хрватска, Босна и Херцеговина, Косово, како и меѓународната организација АЛДА.

                Во таа насока, претставниците од Секторот за развој од Општина Карпош, Александра Теова и Роберт Јанковски активно учествуваа во работните сесии и дискусии, разменувајќи позитивни искуства и добри практики на европско ниво. Целта на проектот „FAIR GAME“ е промоција на родовата еднаквост во спортот, како и зголемување на учеството на жените и девојките во физички активности. Оваа активност ќе се реализира преку зајакната меѓународна соработка, размена на успешни модели и креирање на инклузивни политики на локално ниво.

                На отворањето на конференцијата, директорката за култура, млади и спорт во Општина Пеќ, Џенет Сика, ја нагласи важноста од системска поддршка за еднаков пристап до спортот за сите.

                Во текот на конференцијата беа разгледани клучните предизвици и локалните бариери со кои се соочуваат жените и девојките при вклучување во спортски активности, како и европските перспективи и најдобрите практики презентирани од меѓународните партнери. Особен акцент беше ставен на улогата на локалните институции во креирање и имплементација на инклузивни политики. Со своето учество, Општина Карпош ја потврдува сопствената заложба за промоција на еднаквоста, инклузивноста и динамичниот животен стил, како и за активно учество во европски иницијативи кои придонесуваат за подобрување на квалитетот на живот на граѓаните.

По повод педесетгодишниот јубилеен роденден од формирањето на Општина Карпош, вкупно 50  деца од сите основни училишта на територијата на општината,  учествуваат во групната маска со костим-срце  – „Со љубов од Карпош“, на традиционалната градска манифестација, организирана од Детскиот културен центар „Карпош“,а под покровителство на Град Скопје по повод 1 Април- Денот на шегата.  Пред да заминат на централната манифестација, градоначалникот Сотир Лукровски, ги поздрави основците од училиштата во Карпош, им посака многу среќа во презентацијата на маската и истакна дека образованието на младите карпошани е важен фактор во изградбата на нивната личност и дека Општината и понатаму ќе инвестира во образованието како важен сегмент од развојот на локалната самоуправа.

-Ми претставува огромна чест и задоволство што денеска, токму вие, сте ни гости во нашата општинска зграда и јас како домаќин ви посакувам многу среќа, радост и успех при презентацијата на заедничката маска, која ја претставува нашата Општина Карпош на дефилето оваа година, по повод денот на шегата- Први Април. Вие, нашите најмлади  жители, основци од Карпош, сте нашата сила и енергија. Вие ни ја давате и мотивацијата  Општина Карпош да ја водиме просперитетно и да ја направиме развиено и убаво место за живеење, – истакна првиот човек на локалната самоуправа, Сотир Лукровски.

Оваа традиционална манифестација „Априлијада“ е наменета за децата, родителите и пошироката јавност и има за цел да ја поттикне детската креативност, уметничкиот израз и духот на сплотеноста, шегата и дружењето.

Почнувајќи  од  вчера  (30.03.2026-та)  па  до 3  април, во просториите  на Општина Карпош презентирана е  уметничката изложба  на Марина Богоевска, именувана како „ Танцот на боите“. На изложбата  се претставени  рачно изработени цртежи, како и рачно извезени предмети. На првиот ден од изложбата, Градоначалникот  на  Општина Карпош Сотир Лукровски , истакна дека  локалната самоуправа и во иднина, ќе биде покровител на вакви уметнички настани преку кои граѓаните ќе го  изразуваат  својот  уметнички потенцијал и дека културата во Општина Карпош секогаш ќе зазема значајно место во нејзиниот развој.

-Ми претставува особена чест и задоволство што токму нашата општинска зграда е изложбено место за овие прекрасни уметнички дела од нашата сограѓанка, карпошанката Богоевска. Во текот на оваа недела, нашите граѓани кои ќе доаѓаат во просториите на локалната самоуправа, меѓу другото, ќе можат да ги погледнат и изложените дела на уметницата, нагласи првиот човек на Карпош Сотир Лукровски.

Креативната уметничка Марина Богоевска, се заблагодари  на континуираната поддршката и логистичката помош од страна на општината, без која, како што нагласи, не би можела да креира  и презентира вакви уметнички творби.

Богоевска, во изработка на овие дела користела техника на апстракција со акрилни бои, 3 Д техника на цртеж и парчиња од дрво врз картон. Беа презентирани и рачно изработени, везени и плетени уметнички форми, ставени во рамка.

Оваа самостојна продажна изложба на Богоевска, за време на изминатиот викенд беше одржана и во просториите на Кинотека на Македонија.

Ве известуваме дека 11. седница на Советот на Општина Карпош, ќе продолжи на 31 март 2026 година (вторник) со почеток од 16:30 часот.

Седницата ќе продолжи во просториите на Општина Карпош (сала за совет).

Телефон за контакт – 070/410-631